Սյունիքի մարզպետ Մելիքսեթ Պողոսյանը պաշտոնավարման 100 օրվա կապակցությամբ հարցազրույց է տվել «Սյունյաց երկիր» մարզային պարբերաթերթին։ «Ինձ համար սեւ ու սպիտակ չկա, ինձ համար գերխնդիրը Սյունիքի անվտանգության ապահովումն է, ազգային արժեքների հիման վրա հայոց պետության ինքնիշխանության եւ պաշտպանվածության ամրապնդումը»,–ասել է նա։
Շատերը Ձեզ մեղադրում են Նիկոլ Փաշինյանի կառավարության հետ համագործակցելու եւ հայտնի կապիտուլյացիայից հետո Սյունիքի մարզպետի պաշտոնը ստանձնելու համար:
Նախ՝ Սյունիքի մարզպետի պաշտոնը դժվարագույն այս ժամանակաշրջանում ինձ համար առաքելություն է: Միգուցե նախկինում դա վայելելու պաշտոն է եղել (ինչը եւ ոմանք չեն կարողանում մոռանալ), բայց հիմա… Հիմա դա մարտադաշտի պես մի բան է:
Ես չէի կարող մերժել առաջարկությունը, մանավանդ որ մարտական ընկերներս նույնպես պահանջում էին ։ Հակառակ պարագայում դա պատասխանատվությունից խուսափելու, մարտադաշտից փախչելու նման մի բան կնշանակեր:
Երկիրը, Սյունիքը լարված վիճակում էին եւ շարունակում են մնալ այդպիսին, ու ես պարտավոր էի հնարավորություններիս չափով ծառայել Հայաստանի Հանրապետությանը:
Ի՞նչ անեի, կողք կանգնեի եւ կողքից խոսողի դե՞ր ստանձնեի:
Չէ, դա իմ ճանապարհը չէ: Նույն Մելոն եմ, կաբինետում նստող անձնավորություն չեմ, դաշտային հրամանատար եմ եղել՝ անհանգիստ բնավորությամբ, ամեն լավ բանի համար ուրախացող: Ազգիս ճակատագիրն իմ ճակատագիրն եմ համարել ու համարում,
ուստի եւ չէի կարող առաջնագծում չլինել:
Կողքից խոսողները, եթե իսկապես ցավում են Սյունիքի համար, թող գան ու միասին գործենք, պատրաստ եմ համագործակցության ամեն մի տարբերակի: Իմ խնդիրն այս կամ այն կուսակցությանը, այս կամ այն անհատին ծառայելը չէ: Գերխնդիրս Սյունիքի անվտանգության ապահովումն է, ազգային արժեքների հիման վրա հայոց պետության ինքնիշխանության եւ պաշտպանվածության ամրապնդումը, հանուն ինչի կգործեմ մինչեւ վերջ:
Հարցազրույցը ամբողջությամբ սկզբնաղբյուր կայքում։
