Տարածքային կառավարման եւ ենթակառուցվածքների նախարար Սուրեն Պապիկյանը Իջեւանի համայնքապետարանի աշխատակազմին է ներկայացրել քաղաքապետի պաշտոնակատար Արթուր Ճաղարյանին:
Նախարարությունից հայտնում են, որ շնորհակալություն հայտնելով Տավուշի նորանշանակ մարզպետ Հայկ Ղալումյանին համայնքի ղեկավարման ընթացքում արդյունավետ աշխատանքի համար, նախարարը հույս է հայտնել, որ նոր նշանակումների արդյունքում սահմանային մարզի զարգացմամբ էլ ավելի կամրապնդվի Տավուշի մարզի եւ Իջեւան քաղաքի միջեւ կապը:
Նախարարը հաջողություն է մաղթել Արթուր Ճաղարյանին իրեն վերապահված գործառույթներն իրականացնելու գործում, միաժամանակ հորդորելով աշխատակազմին՝ աջակցել նորանշանակ պաշտոնակատարի գործունեությանը եւ որպես պետական կառավարման կարեւորագույն օղակի ներկայացուցիչներ՝ նպաստել երկրի կայունությանն ու առաջընթացին:
Սուրեն Պապիկյանը կարեւորել է նաեւ Իջեւան համայնքի խոշորացման գործընթացով պայմանավորված առաջիկայում սպասվող ՏԻՄ ընտրությունները եւ դրանց ուղղությամբ նախապատրաստական աշխատանքները:
Իջեւանի համայնքապետի պաշտոնակատար Արթուր Ճաղարյանը շնորհակալություն է հայտնել բարձր վստահության համար՝ հավաստիացնելով, որ քաղաքի առջեւ ծառացած բոլոր խնդիրները կլուծվեն համագործակցության մթնոլորտում:
