Հարգելի հայրենակիցներ, սիրելի վանաձորցիներ, ջերմորեն շնորհավորում եմ ձեզ՝ Աշխատավորների համերաշխության միջազգային օրվա առթիվ։
Հայ աշխատավորը՝ բանվորը, արհեստավորն ու արվեստագետը, բժիշկն ու ուսուցիչն են այն հզոր ուժը, որով զարգանում է երկիրը։ Իր հողին կառչած հայ գյուղացին է իր արդար քրտինքով բարիք ստեղծում, շենացնում իր տունն ու հայրենիքը։
Այսօր, իհարկե, առկա են խնդիրներ աշխատատեղերի ստեղծման, աշխատանքի շուկայի բարելավման եւ աշխատավարձերի բարձրացման հարցերում, իսկ երբեմնի արդյունաբերական Վանաձորը վաղուց պատմություն է, սակայն անլուծելի խնդիրներ չկան:
Պետք է անել հնարավորն ու անհնարինը՝ ՀՀ քաղաքացու համար բարեկեցիկ և արժանապատիվ կյանք ստեղծելու համար:
Վանաձորցին միշտ էլ աչքի է ընկել աշխատանքի հանդեպ ունեցած առանձնահատուկ սիրով։ Ժամանակները փոխվել են, փոխվել են նաև մարտահրավերները, որոնք վանաձորցին պատվով է ընդունում, փորձում չհուսահատվել, մնալ և արարել հայրենի քաղաքում՝ մշտապես աչքի առաջ ունենալով ապագայի տեսլականը։
Շնորհավորելով մայիսմեկյան տոնի առթիվ՝ մաղթում եմ ձեզ խաղաղ ու ստեղծագործ աշխատանք, սեր ու ջերմություն եմ մաղթում ձեր ընտանիքներին: Քրտնաջան աշխատանքվ շենացնենք մեր չքնաղ Վանաձորն ու մեր երկիրը:
