Կարմիրգյուղի թիվ 1 միջնակարգ դպրոցում երեք դասասենյակներ կկրեն Արցախյան 44-օրյա պատերազմում զոհված հերոսների անուններ

Մինչ միջոցառման մեկնարկը ծաղիկներ խոնարհեցինք դպրոցի բակում կանգնեցված Արցախյան առաջին պատերազմում անհայտ կորած Սերգո Ավետիսյանի հուշաքարին:

Անվանակոչման համար ընտրվել էին այն դասասենյակները, որտեղ տղաները իրենց ուսումնառությունն էին անցկացրել վերջին տարիների ընթացքում:

Դասասենյակները հիմնանորոգվել և կահավորվել էին Կարմիրգյուղի համայնքապետարանի, համայնքի բնակիչների և Կարմիրգյուղի թիվ 1 միջնակարգ դպրոցի ուսուցչական կոլեկտիվի ներդրումների և աջակցության շնորհիվ: Բացված յուրաքանչյուր դասասենյակում ստեղծվել էր հուշանկյուն, որը կահավորված էր հավերժի ճամփան բռնած տղաների անձնական իրերով և լուսանկարներով: Անվանակոչված յուրաքանչյուր դասասենյակում դասղեկները հանդես եկան տղաներին բնութագրող պատմություններով:

Մանկավարժները նշեցին, որ հերոս տղաների անունները կրող այդ դասասենյակները հայրենասիրության վառ օրինակ կլինեն գալիք սերունդների համար: Այդտեղ կրթվող յուրաքանչյուր սան պետք է լավ սերտի հայրենանվիրության դասը, իսկ քաջորդիների սխրանքը պետք է հարատև դաս լինի նրանց համար: Նրանց անցած ուղին հավերժ կմնա դպրոցի և համայնքի պատմության էջերում։

Հայրենիքի սահմանների պաշտպանության համար ունեցած ավանդի համար Գարիկ Գափոյանին հետմահու շնորհվեց ՀՀ պաշտպանության նախարարության կողմից սահմանված «Մարտական ծառայության » մեդալ, որը հանձնեցի Գարիկի հորը։

Հիշատակեցի , որ ամիսներ շարունակ ապրում ենք հետպատերազմյան մղձավանջը: Բայց ինչքան էլ տղաների կորուստը ծանր է, սակայն նրանց ծնողների հետ զրուցելիս հաճախ եմ ասում, որ նրանք թեև կարճ ապրեցին, սակայն մահվան ամենափառահեղ տարբերակը ընտրեցին. հերոսացան հանուն հայրենիքի:

Խնդրեցի մեր հերոսների ծնողներին,որ երբեք չխեղճանան, չընկճվեն։ Նրանց զավակները զոհվել են, որպեսզի մենք, մեր ժողովուրդը ավելի լավ ապրենք, մեր հայրենիքը ավելի հզոր լինի: Մենք մեծ ջանքերով, մեծ նվիրումով պետք է շենացնենք մեր հայրենիքը:

Հավերժ փառք մեր տղաներին, և տա Աստված, որ մեր անհայտ կորած տղաներից շուտափույթ լավ լուր ստանանք։