Ապրիլի 28-ին, առեղծվածային հրդեհի մի քանի դեպք է տեղի ունեցել Երևանում: Ժամը 04:30-ի սահմաններում Արտակարգ իրավիճակների նախարարության փրկարար ծառայության 911 ճգնաժամային կառավարման կենտրոն ահազանգ է ստացվել, որ Շենգավիթ վարչական շրջանի տարածքում գտնվող Խարբերդի ամառանոցների «2-րդ պալավինկա» կոչվող հատվածում գտնվող խանութներից մեկում հրդեհ է բռնկվել: Ինչպես հայտնում է ֆոտոլրագրող Գագիկ Շամշյանը, օպերատիվորեն ժամանել է ԱԻՆ ՓԾ թիվ 6 և թիվ 4 հրշեջ-փրկարարական ջոկատներից 1-ական մարտական հաշվարկ: Պարզվել է, որ հրդե է բռնկվել միաժամանակ Խարբերդի ամառանոցներ 5-րդ և 16-րդ փողոցներում և 5-րդ փողոցի 105/1 հասցեում գտնվող խանութում: Հրդեհները մարվել ու մեկուսացվել են քաղաքացիների և հրշեջների օգնությամբ: Գ. Շամշյանի տեղեկություններով՝ նշված 3 խանութները պատկանում են «Անահիտ Դանիելյան» ԱՁ-ին: Հրդեհի հետևանքով այրվել են ծխախոտի վահանակներ, օդորակիչներ, էլեկտրական լարեր, համակարգիչ և այլ իրեր: Դեպքի վայր է ժամանել նաև ոստիկանության Շենգավիթի բաժնի հերթապահ խումբը՝ օրվա պատասխանատու հերթապահի գլխավորությամբ: Ոստիկանությունը պարզում է, թե ինչ հանգամանքներում է միանգամից հրդեհ բռնկվել 3 խանութներում, որոնք պատկանում են մեկ հոգու:
