Հանրապետության տոնի առթիվ շնորհավորական ուղերձ է հղել Սյունիքի մարզպետ Ռոբերտ Ղուկասյանը․
«Սիրելի՛ սյունեցիներ
Շնորհավորում եմ բոլորիս մայիսի 28-ին նշվող Հանրապետության տոնի կապակցությամբ։
Մայիսյան հերոսամարտերի արդյունքում ստեղծված Հայաստանի Առաջին Հանրապետությունը մեզ համար դարձավ պետականություն ունենալու վաղեմի ու բաղձալի երազանքի իրագործումը։
1918-ի մայիսյան պատմական ու շրջադարձային իրողությունը հայ ժողովրդի համար հետագայում դարձավ նաեւ անկախության, Երրորդ հանրապետության ու ինքնիշխանության համար պայքարի հիմնաքարը։
Պարտավոր ենք ապրել այնպես, որ իրավունք ունենանք կոչվելու Մայիսի 28-ը մեզ պարգեւած հերոսների ժառանգը։ Իսկ այդ հերոսների շարքում հավերժ մեծարանքի արժանի ու անօրինակ սխրանքներ գործած սյունեցիներ կան․․․ Շնորհակալ ենք նրանց նաեւ մեր այսօրվա հայրենիքի համար։
Հիշելով, թե պատմական ինչ իրավիճակում է կերտվել Մայիսի 28-ը, պետք է ընդունենք, որ այս տոնը մեր ուժերի հանդեպ ինքնավստահության, ազգային համախմբման դեպքում ուժի ու անպարտելիության ապացույցն է, որից դասեր ունենք քաղելու։
Մաղթում եմ բոլորիս միասնություն, խաղաղություն, բարություն եւ սեր՝ միմյանց ու Հայրենիքի հանդեպ»։
