Գյումրու թիվ 25 դպրոցի ուսուցիչներին ու ծնողներին տեղեկացնում են, որ ռազմական դրության ժամանակ դասադուլ անելու իրավունք չունեն ու եթե դասադուլ են արել, ապա նաեւ աշխատավարձ չեն ստանա, գործը ուղարկվելու է դատախազություն: Այս մասին ֆեյսբուքյան իր էջում գրել է Ազգային ժողովի պատգամավոր Սոֆյա Հովսեփյանը։
«Լավ էս անօրեն մոտեցումով մինչեւ ո՞ւր : Ես չգիտեմ, թե կրթության նախարարությունը ինչու՞ է ձեռքերը լվացրել քաշվել կողքի: Միայն այն, որ նորանշանակ տնօրենը ի վիճակի չէ դասապրոցես կազմակերպելու եւ կոլեկտիվի ու ծնողների վստահությունը շահելու, արդեն խոսում է մի շարք հարցերի մասին:
Հուսամ Աշխատանքի եւ սոցիալական հարցերի պետական տեսչությունը, Կրթության տեսչությունը, ԿԳՄՍ-ն հարցին խիստ մոտեցում կցուցաբերեն եւ մի մեծ համայնքի շահերը չեն ստորադասի մի քանիսի կապրիզներից, բարի՛ եղեք, քայլեր ձեռնարկեք եւ լուծեք անլուծելի թվացող, բայց մեկ ժամ պահանջող հարցը եւ ազատե՛ք դպրոցը որոշների սիրելի տնօրենից: Ստիպված եմ հրապարակային հանդես գալ, քանի որ գրավոր եւ բանավոր բոլոր դիմումները ուղարկված են եւ պատասխանները ամոթալի են:
Ռազմական դրության ժամանակ հովանավորչություն անելուց չխուսափեցին, բայց աշխատավարձ չտալով ու դատախազություն դիմելով են վախեցնում»,-գրել է պատգամավորը։
