2021թ. մարտի 4-ին, քաղաքացին հաղորդում է տվել այն մասին, որ մարտի 1-ին՝ ժամը 10:30-ից մինչեւ 10:45-ն ընկած ժամանակահատվածում, Արմավիր քաղաքի 48-ամյա բնակիչը ապօրինի մուտք է գործել իր բնակարան եւ առանց պատճառի, դիտավորությամբ ապօրինաբար կյանքից զրկելու` սպանելու նպատակով, իր մոտ եղած սեւ գույնի լիցքավորիչի մալուխով փորձել է խեղդել իրեն: Այս մասին հաղորդագրություն է տարածել ՀՀ քննչական կոմիտեն:
«Դեպքի առթիվ ՀՀ քննչական կոմիտեի Արմավիրի մարզային քննչական վարչությունում հարուցվել է քրեական գործ՝ ՀՀ քրեական օրենսգրքի 34-104-րդ հոդվածի 1-ին մասով: Հաղորդում ներկայացրած կինը տուժող է ճանաչվել:
Ձեռնարկված միջոցառումների արդյունքում 48-ամյա տղամարդը հայտնաբերվել, բերման է ենթարկվել ՀՀ ոստիկանության կողմից եւ ներկայացվել վարույթն իրականացնող մարմնին:
Ձեռք բերված բավարար ապացույցների համակցությամբ՝ 48-ամյա տղամարդուն մեղադրանք է առաջադրվել՝ ՀՀ քրեական օրենսգրքի 34-104-րդ հոդվածի (սպանության փորձ) 1-ին մասով: Վերջինս կալանավորվել է:
Նախաքննությունը շարունակվում է»,- ասված է հաղորդագրության մեջ:
