Այսօր Շրջակա միջավայրի նախարարությունը տեղեկացրել է, որ Ռոմանոս Պետրոսյանը մասնակցել է Եվրամիության ու Գերմանիայի Դաշնային Հանրապետության տնտեսական համագործակցության եւ զարգացման նախարարության կողմից համատեղ ֆինանսավորվող «Սեւանա լճի շրջակա միջավայրի պաշտպանություն» («EU4Sevan») ծրագրի պաշտոնական առցանց մեկնարկին։
Միջոցառումը համախմբել էր «EU4Sevan» ծրագիրը ֆինանսավորող եւ իրականացնող կառույցների, պետական կառավարման եւ Գեղարքունիքի մարզային, տեղական ինքնակառավարման մարմինների ներկայացուցիչներին, ՀՀ-ում հավատարմագրված դիվանագիտական ներկայացուցչություններին, պետական եւ մասնավոր ոլորտների գործընկերներին եւ փորձագետներին՝ նշելու ծրագրի պաշտոնական մեկնարկը:
Ծրագրի պաշտոնական առցանց մեկնարկին մասնակցել են Հայաստանում ԵՄ պատվիրակության ղեկավար, դեսպան Ն.Գ. Անդրեա Վիկտորին, Հայաստանում Գերմանիայի Դաշնության դեսպան Ն.Գ. Միխայել Յոհաննես Բանցհաֆը, ՄԱԿ–ի Զարգացման ծրագրի մշտական ներկայացուցչի ժամանակավոր պաշտոնակատար Միհաելա Ստոյկոսկան, Շրջակա միջավայրի նախարարի տեղակալ Աննա Մազմանյանը, Տարածքային կառավարման եւ ենթակառուցվածքների նախարարի տեղակալ Վաչե Տերտերյանը եւ Գեղարքունիքի մարզպետ Գնել Սանոսյանը։
Բացման խոսքով հանդես է եկել Շրջակա միջավայրի նախարար Ռոմանոս Պետրոսյանը։
Նախարարն իր երախտագիտությունն է հայտնել Սեւանա լճի հիմնախնդիրների կարգավորման նպատակով իրականացվող գործողությունների եւ ներդրված ջանքերի համար, ապա անդրադարձավ Սեւանա լճի հիմնախնդիրներին։
Սեւանա լիճը Հայաստանի Հանրապետության համար ունի գեոքաղաքական մեծ նշանակություն, որպես տարածաշրջանային բարձրլեռնային քաղցրահամ ջրի ամենամեծ պաշար: Որպես բնատարածքային համալիր, լիճն իրենից ներկայացնում է բնության տարբեր տարրերի սերտ փոխկապակցվածություն եւ ունի կլիմայագոյացնող կարեւոր նշանակություն՝ ինչպես Հայաստանի, այնպես էլ տարածաշրջանային եւ գլոբալ առումով: Այն ազգային անվտանգության եւ ռազմավարական գերակա նշանակություն ունեցող բնական պաշար է, որի պահպանության գործում անելիք ունենք բոլորս:
Միաժամանակ ներկայումս գլոբալ բնապահպանական հիմնախնդիրների շարքում առանձնակի տեղ է զբաղեցնում քաղցրահամ ջրի պաշարների կրճատման հարցը, կապված կլիմայի փոփոխության եւ տեղումների նվազման հետ:
Շնորհակալություն հայտնելով գործընկերներին՝ ոլորտում իրականացվող բարեփոխումներին մշտական աջակցության համար, նախարարը վերահաստատել է Շրջակա միջավայրի նախարարության պատրաստակամությունը շարունակական համագործակցության համար՝ Ծրագրով նախատեսված գործողությունների լիարժեք եւ արդյունավետ իրականացումն ապահովելու նպատակով:
«Սեւանա լճի շրջակա միջավայրի պաշտպանություն» (EU4Sevan) ծրագիրը նպատակ ունի՝
բարելավել Սեւանա լճի ջրահավաք ավազանի ջրի մշտադիտարկումն ու կառավարման կարողությունները,
բարելավել էկոհամակարգի համար բարենպաստ եւ ջուր խնայող հողօգտագործման ու մշակման գործողությունների իրականացման կարողությունները,
բարելավել կեղտաջրերի մաքրման, ներառյալ բնության վրա հիմնված լուծումների իրականացման կարողությունները,
բարձրացնել Սեւանա լճի պաշտպանության վերաբերյալ իրազեկումն ու տեղեկատվության հասանելիությունն ավազանին կից համայնքների, մասնավոր հատվածի եւ այլ շահագրգիռ կողմերի շրջանում,
բարելավել Սեւանա լճի էկոհամակարգի կառավարումը։
Ծրագրի ֆինանսավորումը 5,7 միլիոն եվրոյին համարժեք ՀՀ դրամ է, իսկ իրականացման ժամանակաշրջանը՝ 48 ամիս (սեպտեմբեր 2020 – օգոստոս 2024):
