ՏԿԵ նախարար Սուրեն Պապիկյանն այսօր այցելել է Պտղունք, որտեղ հիմնովին վերակառուցվում է համայնքի միակ դպրոցը։ Նախարարին ուղեկցել են ՏԿԵՆ Հայաստանի տարածքային զարգացման հիմնադրամի գործադիր տնօրեն Արթուր Սողոմոնյանը եւ դպրոցի շինարարությունն իրականացնող կապալառու ընկերության հիմնադիր տնօրեն Սամվել Խաչատրյանը
Արմավիրի մարզի Պտղունք համայնքի Տիգրան Մեծի անվան միջնակարգ դպրոցը կառուցումից ի վեր երբեք չի վերանորոգվել։ Շենքն ուներ 4-րդ կարգի վթարայնության աստիճան, ինչը խիստ վտանգավոր էր դարձնում կրթական ծրագրերի անցկացումը։ Ամենակարեւոր խնդիրներից մեկն էլ այն էր, որ դպրոցահասակ երեխաներից ընդամենը 40 տոկոսին էր հաջողվում հաճախել համայնքի դպրոց, մյուսներն ուսում ստանալու նպատակով ստիպված էին գնալ այլ համայնքներ։
Դեռեւս 2018թ․ հունիսին Պտղունք կատարած այցի ժամանակ նախարար Պապիկյանը ծանոթացել էր դպրոցի շենքի վթարային պայմաններին։ Սուրեն Պապիկյանը համայնքի բնակիչներին եւ ուսուցչական կազմին խոստացել էր հետամուտ լինել դպրոցի բարեկարգմանն ու աշակերտների համար անվտանգ կրթական միջավայրի ապահովմանը։
2018թ. դեկտեմբերին Պտղունքի միակ դպրոցը ընդգրկվեց դպրոցների սեյսմիկ անվտանգության բարելավման ծրագրում։ Հաշվի առնելով շենքի անմխիթար վիճակը` այն քանդվել էր եւ նախատեսվել էր կառուցել սեյսմակայուն նոր շենք։ Ներկայումս ընթանում են դպրոցի նոր մասնաշենքի շինարարական աշխատանքները:
Նախարար Պապիկյանը դպրոցի շինհրապարակում հորդորել է պատասխանատուներին հետեւողական լիենլ շինարարության որակի եւ նախանշված ժամկետում ավարտելու հարցում։ Նախարարին ներկայացվել է դպրոցի նոր շենքի նախագիծը, նշվել է, որ մոդուլային դպրոցի շինարարական աշխատանքները նախատեսվում է ավարտել 18 ամսից։ Դպրոցի շահառու ավելի քան 240 աշակերտները եւ ուսուցչակազմը շուտով կհաճախեն ժամանակակից եւ սեյսմակայուն դպրոց:Այն հարմարեցված կլինի նաեւ հաշմանդամություն ունեցող երեխաների համար, կունենա վերելակ, ջեռուցման, հակահրդեհային, ջերմամեկուսացման համակարգեր, հարմարավետ մարզադահլիճ։ Այս բոլոր աշխատանքների համար ներդրվել է 886 մլն դրամ, որից 16,7 %-ը ներդրվում է ՀՀ կառավարության կողմից, մյուս մասը՝ համաֆինանսավորվում Ասիական զարգացման բանկի կողմից։
«Տարածքային կառավարման եւ ենթակառուցվածքների նախարարությունը հանրապետության ողջ տարածքում հսկայածավալ աշխատանքներ է իրականացնում, որոնք ի տարբերության ճանապարհաշինության, պակաս տեսանելի են հանրության համար։ Դրանց թվում շատ են հատկապես դպրոցաշինական, մանկապարտեզների շինարարության, ջրագծերի անցկացման, ջրանցքների վերանորոգման եւ բազում այլ ենթակառուցվածքների բարեկարգման ծրագրերը»,– ընդգծել է նախարար Պապիկյանը։
Նախարարը եղել է նաեւ Երեւանի 18-րդ դպրոցի շինհրապարակում, հետեւել շինարարության ընթացքին։ Դպրոցի շենքը կառուցվել էր դեռեւս 70-ականներին եւ գտնվում էր վթարային վիճակում։ Հաշվի առնելով սեյսմակայունության հետ կապված խնդիրները` որոշում է կայացվել շենքը հիմնովին քանդել եւ կառուցել բոլորովին նոր դպրոց. կպահպանվի միայն նախկին շենքի արտաքին պատը, քանի որ այն իրենից ճարտարապետական արժեք է ներկայացնում։ Դպրոցը կառուցվում է 432 աշակերտի համար։ Դպրոցի կառուցման համար ներդրվել է 986 մլն դրամ, որից 20%-ը հատկացվել է ՀՀ կառավարության կողմից, մյուս մասը Ասիական զարգացման բանկից ներգրավված վարկային միջոցներն են։
