Գյումրու Վարդան Աճեմյանի անվան պետական դրամատիկական թատրոնը, Թատրոնի միջազգային օրը, նշանավորեց թատրոնի պաշտոնական կայքի գործարկմամբ: Այն ոչ միայն հնարավորություն կտա հանդիսատեսին ծանոթանալու թատրոնի ինֆորմացիոն ողջ բազային՝ տարեգրություն, դերասանական կազմ, ներկայացումներ, այլ նաեւ առցանց տոմսեր պատվիրել: Թատոնին ու թատերասերներին այս անգնահատելի նվերն անվարձահատույց մատուցել է Brain Fors թիմը:
Կայքի շնորհանդեսին, մասնագիտական տոնի առթիվ, շնորհավորելով ոչ միայն աճեմյանցիներին, այլ նաեւ բոլոր թատերասերներին, թատրոնի գեղարվեստական ղեկավար եւ տնօրեն Լյուդվիգ Հարությունյանն առողջություն ու խաղաղություն մաղթեց: «Թատրոնի միջազգային օրը տոն է շնորհավորելու բոլոր այն մարդկանց, ովքեր միշտ եղել են ու կան թատրոնի կողքին ու թատրոնի ամենամտերիմ բարեկամներն են: Մասնագիտական տոնն ինձ համար միշտ տոն է եղել, բայց ամենալավ նվերը ստացանք այսօր՝ այս կայքով: Մենք սրա մասին տարիներ ենք մտածել: 21-րդ դարում սա այն կարեւոր բանն էր, որ պետք է ունենար թատրոնը, բայց չուներ»,-շնորհավորելով բոլորին նշեց Լյուդվիգ Հարությունյանը շնորհակալություն հայտնելով նաեւ այն լրատվամիջոցներին, որոնք միշտ եղել են թատրոնի կողքին:
Օրվա առիթով Գյումրու Վ.Աճեմյանի անվան պետական դրամատիկական թատրոնի 9 աշխատակիցների Գյումրի համայնքի ղեկավար Սամվել Բալասանյանի անունից պատվոգրեր հանձնվեցին` արդյունավետ աշխատանքային գործունեության եւ թատերական արվեստի զարգացման գործում ունեցած մեծ ավանդի համար: Գյումրու համայնքապետարանի մշակույթի բաժնի պետ Լիլիթ Թովմասյանը շնորհավորեց բոլորին մասնագիտական տոնի առիթով` մաղթելով բեղմնավոր աշխատանքային եւ ստեղծագործական գործունեություն, միաժամանակ ներկաներին փոխանցեց նաեւ Սամվել Բալասանյանի շնորհավորական ուղերձը:
Տոնի առթիվ կայքի ստեղծման համար թատրոնի տնօրինության անունից շնորհակալագիր ստացան նաեւ Brain Fors թիմն ու Անի ֆոտոսերվիսը:
Արմենուհի Մխոյան
