Շիրակի մարզպետ Հովհաննես Հարությունյանի ուղերձը ապրիլի 7-ի առթիվ․
«Սիրելի՛ մայրեր, քույրեր, կանայք եւ աղջիկներ, շնորհավորում եմ Ձեզ մայրության եւ գեղեցկության տոնի առթիվ։
Մարիամ Աստվածածնի ավետման այս օրը եւս մեկ առիթ է կնոջ ոգեղեն առաքելությունն ընդգծելու եւ կարեւորելու, ինչպես նաեւ հնարավորություն է վերաիմաստավորելու մեր ընտանեկան արժեքները, մեծարելու հայ կնոջն ու հայ մայրերին։
Ձեր հերոսածին շնորհի, անկոտրում կամքի, մայր կոչմանն արժանի լինելու մասին դարերն ու մեր պատմությունն են վկայակոչում։
Երախտագիտության վեհ զգացումով ուզում եմ շնորհավորել, հատկապես, հայ զինվորների մայրերին, որոնց որդիների սխրանքն անմահ է, արարքը՝ վսեմ։
Սիրելիներս, Ձեր հոգատարությունը, քնքշանքը, սերն ու օրհնությունն ամենազորեղ պահապան ուժն են բոլորիս համար։
Թող կյանքը Ձեզ համար լինի գարնանային օրվա նման արեւոտ ու լուսաշող եւ մայրական աչքերում այսուհետ միայն երջանկության արցունքներ երեւան։
Թող որդիական սերն ու հոգատարությունը մշտապես լինեն ձեր կյանքի ուղեկիցը։
Մաղթում եմ բոլորիդ առողջություն, երջանկություն եւ բարեկեցություն»։
