Նոր կորոնավիրուսի պատճառով մարտի 29-ից Վանաձորի Հովհաննես Աբելյանի անվան պետական դրամատիկական թատրոնը ժամանակավորապես դադարեցրել է գործունեությունը:
Թատրոնի տնօրեն Լուսինե Սահակյանը «Հայկական ժամանակի» հետ զրույցում հայտնեց, որ նախնական որոշմամբ երկու շաբաթով թատրոնը փակ կլինի, պատճառը գրեթե մեկ տասնյակի հասնող կորոնավիրուսով վարակված դերասաններն են:
«Անձնակազմի ինքնամեկուսացման ժամկետները լրանալուց հետո կտեսնենք՝ եթե ամեն ինչ նորմալ լինի, կվերսկսենք աշխատանքները: Բնականաբար, մենք անչափ կարեւորում ենք հանդիսատեսի առողջությունը, եւ եթե մեր ներկայացման մեջ զբաղված դերասանը գոնե կարճ ժամանակամիջում փոխարինելի չէ, ապա տվյալ ներկայացումը խաղալ չենք կարող, իսկ եթե ներկայացում չենք խաղում, ուրեմն թատրոնն էլ փակ է»,- ասաց նա:
Թատրոնի տնօրենի խոսքով՝ կորոնավիրուսով վարակված դերասանները հիվանդությունը հիմնականում թեթեւ են տանում:
Նկատենք՝ առողջապահական եւ աշխատանքի տեսչական մարմնի հյուսիսային տարածքային կենտրոնի հիգիենիկ, սանիտարահիգիենիկ եւ հակահամաճարակային վերահսկողության բաժնի պետ Անահիտ Զատիկյանը, «Ազատություն ռադիոկայանի» հետ զրույցում անդրադառնալով Վանաձորի թատրոնի փակմանը, նշել էր, որ, չնայած թատրոնում առանց դիմակների մուտքի արգելքին, մարդիկ մտել են առանց դիմակի: Ըստ Զատիկյանի՝ Վանաձորի թատրոնում ներկայացումների ժամանակ վաճառվել են տոմսերի 100 տոկոսը՝ հաշվի չառնելով հակահամաճարակային կանոններն ու անհրաժեշտ սոցիալական հեռավորությունը:
Լուսինե Սահակյանը հերքեց վերոնշյալ տեղեկատվությունը, թե թատրոնում սոցիալական հեռավորություն չի պահպանվել, կամ 100 տոկոսով են տոմսեր վաճառել: «Հնարավորինս պահպանվել է սոցիալական հեռավորությունը, երբ համավարակի պիկ էր եղել, մենք անգամ նստարանները սկոտչով փակել էինք, որովհետեւ բոլոր դեպքերում գտնվում էին մարդիկ, ովքեր մտածում էին, որ պարտադիր իրար կողք պիտի նստեն: Եթե նույն տրանսպորտով, օրինակ, 10 հոգով եկել, հասել են թատրոն, նրանք երազում են, որ իրար կողք նստեն մեկ շարքում: Մենք 2-ական նստարան թողել էինք, իսկ 2-ական էլ՝ փակել: Բայց բազմաթիվ օրինակներ էլ ունեցանք, որ համավարակը ոչինչ չի հարցնում, անգամ այդ 1.5 մետր հեռավորությունը, ըստ էության, դժվար հաղթահարելի տարածություն չէ»,- ասաց Լուսինե Սահակյանը:
Նա նաեւ հավելեց, որ նստատեղերի հետ կապված սահմանափակումները հանվեցին այն ժամանակ, երբ վերացվեց փակ տարածքներում մարդկանց քանակի սահմանափակումը: «Բոլոր դեպքերում այս ընթացքում մեր թատրոնը 100 տոկոսանոց դահլիճ չի ունեցել»,-մասնավորեցրեց նա:
Լուսինե Սահակյանի խոսքով՝ ապրիլի 16-ին թատրոնում սպասվում է ներկայացում՝ Հ. Թումանյանի հեքիաթներից մեկի հիման վրա բեմադրված «Լինում է չի լինումը»: Վերաբացվելուց հետո կրկին որոշակի հեռավորությամբ է հանդիսատեսը նստելու: «Հանդիսատեսի փոխարեն խոստանալ, որ ներկայացման ամբողջ ընթացքում հանդիսատեսը դիմակ է կրելու, ինչքան էլ թատրոնի աշխատակիցները փորձեն, չենք կարող, ընթացքում կարող է լինել անկարգապահ հանդիսատես, որը դիմակ չի կրի»,- նկատեց տնօրենը:
Առողջապահական եւ աշխատանքի տեսչական մարմնից «Հայկական ժամանակին» հայտնեցին, որ Վանաձորի թատրոնում տեսչական մարմնի հյուսիսային տարածքային կենտրոնի մասնագետները (հիգիենիստները) օրերս իրականացրել են ստուգայց, սակայն հակահամաճարակային կանոնների խախտումներ չեն արձանագրել: «Թատրոնի հետ կապված բողոք, ահազանգ տեսչականում չեն ստացվել»,- հավելեցին Առողջապահական եւ աշխատանքի տեսչական մարմնից:
