Վարչապետը, այսօր ԱԺ-ում անդրադառնալով Իլհամ Ալիեւի վերջին օրերի հայտարարություններին, ասաց, որ դրանք նոր չեն, դրանք անընդհատ հնչել են:
«Հիմա նոր ոգեւորություն է մտել, եւ, իմ կարծիքով, որոշակի դիագնոզ է մտել այդ հայտարարությունների մեջ, որովհետեւ ստեղծել թանգարան, որտեղ պատկերված են զոհված զինվորների մարմիններ, այդ ֆոնին նկարվել, դա ի ցույց դնել միջազգային եւ սեփական հանրությանը, այստեղ, կարծում եմ, որ որոշակի հոգեբանական աջակցության հարց է առաջանում: Եվ նույնիսկ կարծում եմ, որ ոչ թե ագրեսիվությամբ եւ վրեժով, այլ կարեկցանքով պետք է լցվել նման պահվածք ցուցաբերող մարդկանց նկատմամբ»,- ասաց վարչապետը:
Նիկոլ Փաշինյանը նշեց, որ եթե չի սխալվում, Իգնատ Մամյանը մի բանաստեղծություն էր գրել, որտեղ այսպիսի քառատող կա.
«Ես քեզ չեմ ատում, ես խղճում եմ քեզ,
Այդպես խղճում են մարդիկ խելացի
Հոգեհիվանդի մռայլ վանդակից
Իրեն հայհոյող խենթ արարածին»։
Ես կարծում եմ, որ այս քառատողն է մեր պատասխանը Իլհամ Ալիեւին»,- եզրափակեց Փաշինյանը:
