Մենք տնտեսության վերականգնման հերթական ազդակն ենք ստացել, եւ ըստ էության կարող ենք արձանագրել, որ 2021 թվականի մարտին մենք աշխատատեղերի եկամուտ եւ աշխատավարձ ունեցող աշխատատեղերի թվի աճ ենք ունեցել: Այս մասին, այսօր՝ ապրիլի 22-ին, կառավարության նիստում հայտարարեց ՀՀ վարչապետ Նիկոլ Փաշինյանը:
ՊԵԿ նախագահ Էդվարդ Հովհաննիսյանը նշեց, որ նախորդ տարվա մարտի համեմատ այս տարվա մարտին հարկման բազա ունեցող աշխատատեղերը ավելացել են 2500-ով. «Հաշվի առնելով անցյալ տարվա մարտից համավարակի առկայությունը, եւ դրա հնարավոր ազդեցությունը, համեմատական վերլուծություն իրականացվել է նաեւ 2019-ի համեմատ: 2019-ի մարտի համեմատ աշխատատեղերի քանակն ավել է 38 հազարով: Հարկման բազան կազմել է 131 մլրդ դրամ եւ այդ ցուցանիշը 2020-ի համեմատ ավել է 7,5 մլրդ դրամով, իսկ 2019-ի համեմատ՝ 24 մլրդ-ով: Միջին աշխատավարձը, միջին հարկման բազան կազմել է 211 500 դրամ, որը 2020-ի նկատմամբ ավել է 12 հազարով, իսկ 2019-ի համեմատ ավել է շուրջ 28 հազարով»:
Հովհաննիսյանը նկատեց, որ այս տվյալները հիմնված են հենց հարկ վճարողների ներկայացրած հաշվետվություններից, եւ այդ եկամուտներից նրանք հարկ են վճարել:
ՊԵԿ նախագահը նկատեց, որ ավելացած աշխատատեղերի մեջ կան ինչպես նոր աշխատատեղեր, այնպես էլ ստվերից դուրս եկած աշխատատեղեր. «Ապրիլին 2019-ի համեմատ ապրանքաշրջանառության եւ գործարքների քանակով այն աճել է 20-22 տոկոսով: Ստվերի հատվածը մեծ է,քանի որ ունենք հսկողական աշխատանքներ, որտեղ թվային պատկերները հստակ են»:
Նիկոլ Փաշինյանը նշեց, որ առեւտրաշրջանառության մասով պետք է հաշվի առնել, որ կա նաեւ գնաճի գործո նը. «Բայց ենթադրում եմ, որ եթե կա 20 տոկոսի աճ, ենթադրենք 5-6 տոկոս գնաճ ունենք, պետք է հաշվել, թե որքան է գնաճով պայմանավորված աճը եւ որքան է բուն, բովանդակային աճը»:
Վարչչապետը նշեց, որ աշխատատեղերի թիվը ՀՀ-ում շուրջ 622 հազար է, իսկ 600 հազարի շեմը հաղթահարվել է 2019-ի մայիսին. Այս պահին 2018-ի մարտի համեմատ ունենք մոտ 85 հազար աշխատատեղի աճ: Նրա խոսքով, այս տարվա մարտին գրանցված աշխատատեղերի առումով ունենք ռեկորդ:
Իր հերթին էկոնոմիկայի նախարար Վահան Քերոբյանը նշեց, որ եթե այս տեմպերով գնան, ապրիլին կունենանք գրանցված աշխատատեղերի թվի ռեկորդ ՀՀ պատմության մեջ. «Սա խոսում է այն մասին, որ աշխատատեղերի շուկան ամբողջությամբ վերականգնվել է: Անհամբերության սպասում ենք վիճակագրության կոմիտեի տվյալներին, որ տեսնենք, թե ինչ տվյալներ ունենք ՀՆԱ-ի եւ տնտեսական ակտիվության ցուցանիշի մասով»:
