Գոգարան համայնքում՝ ձեռամբ Գուգարաց թեմի առաջնորդ տեր Հովնան եպիսկոպոս Հակոբյանի, տեղի ունեցավ Արցախյան 2-րդ պատերազմում զոհված եղբայրներ Ադամ և Արամ Այվազյանների հիշատակին նվիրված խաչքարի բացման և օծման արարողությունը. Հայրենական մեծ պետարազմում և Արցախյան առաջին ազատամարտում զոհվածների հիշատակը հավերժացնող հուշարձանների կողքին ավելացավ ևս մեկ խաչքար՝ դառնալով եղբայրների հավե՛րժ ներկայության լուռ վկան:Խաչքարի բացմանը ներկա էին Լոռու մարզպետ Արամ Խաչատրյանը, փոխմարզպետ Քաջայր Նիկողոսյանը, մարզային, համայնքային ու հոգևոր դասի ներկայացուցիչներ, տղաների հարազատներն ու բազմաթիվ գոգարանցիներ:
Արարողությունը մեկնարկեց մեկ րոպե լռությամբ հարգանքի տուրքով ու միասնական տերունական աղոթքով. բոլոր աղոթքները մեկ ուղերձ ունեն՝ տղաների անմահ հոգիներին խաղաղություն ու երկնային հավերժություն:Ողջունելով, մխիթարանքի և ոգեկոչման խոսք հղելով ներկաներին՝ մարզի ղեկավարը նշեց.
-Արցախյան պատերազմում հերոսաբար նահատկված մեր եղբայրները իրենց կյանքը դրեցին հայրենիքի ազատության զոհասեղանին, խոնարհումս բոլո՛ր ժամանակների ընկածներին:
Պատերազմը մեզնից շատ բան խլեց, բայց և պարտավորեցրեց՝ այսօր, առավել քան երբևէ, պետք է զգոն լինենք, կրթենք ու դասիարակենք այնպիսի՛ հզոր սերունդ, որ վաղը կկարողանա կերտել նահատակված մեր եղբայրների՛, մեր որդիների՛ երազած երկրի ապագան: Խոնարհվում եմ տղաների հիշատակի առջև, խոնարհվում եմ նրանց ընտանիքի առջև, հավերժ փա՛ռք ընկածներին:
Միջոցառման մասնակիցները ծաղիկներ դրեցին խաչքարին, գլուխ խոնարհեցին։ Գոգարանի դպրոցի սաները հանդես եկան հայ զինվորին ու հայրենիքին նվիրված շնորհակալանքի ու նվիրումի խոսքերով։
Լոռու մարզպետը և ՀՀ ՊՆ զորակոչային և զորահավաքային ծառայության Լոռու մարզի տարածքային ստորաբաժանման Սպիտակի բաժանմունքի պետ Հրահատ Գևորգյանը Ադամի և Արամի հետմահու ստացած 《Մարտական ծառայության》 մեդալը հանձնեցին տղաների հորը՝ Նվեր Այվազյանին:Ադամ և Արամ Այվազյանները ապրել են Ռուսաստանի Դաշնությունում, վերադարձել էին՝ հայրենիքի առջև իրենց պարտքը կատարելու: Ցավոք, 44 -օրյա պատերազմը խլեց տղաների կյանքը. Ադամը զոհվել է նոյեմբերի 9-ին՝ Մատաղիսի պաշտպանության, Արամը՝ հոկտեմբերի 18-ին՝ Ջաբրայիլի պաշտպանության մարտերում:
