ՀՀ քննչական կոմիտեն մանրամասներ է հայտնել երեկ Էջմիածնում տեղի ունեցած սպանության դեպքից: Պարզվում է՝ սպանված երիտասարդի հետ միասին մեքենայում եղել է ևս մեկ տղամարդ: Նրանց նկատմամբ մահափորձ կատարած մարդը անկանոն կրակոցներ է իրականացրել մեքենայի ուղղությամբ, ապա՝ դիմել փախուստի: Երկրորդ երիտասարդը վնասվածքներով տեղափոխվել է հիվանդանոց:
ՔԿ հաղորդագրությունը ներկայացնում ենք ստորև.
2021թ. մայիսի 4-ին՝ ժամը 22:35-ին, ՀՀ ոստիկանության Վաղարշապատի բաժին բժշկական կենտրոնից հաղորդում է ստացվել այն մասին, որ հրազենային վնասվածքով, մահացած վիճակում իրենց մոտ է տեղափոխվել 1992թ. ծնված երիտասարդ: Քիչ անց ստացվել է ևս մեկ ահազանգ այն մասին, որ «Կրծքավանդակի փափուկ հյուսվածքների սալջարդ» ախտորոշմամբ բուժօգնության է ընդունվել 2000թ. ծնված մեկ այլ երիտասարդ:
Ձեռնարկված միջոցառումների արդյունքում պարզվել է, որ 2021թ. մայիսի 4-ին՝ ժամը 22:30-ի սահմաններում, ենթադրյալ հանցագործություն կատարած անձը Էջմիածին քաղաքի Վազգեն Առաջին փողոցում շատերի կյանքի համար վտանգավոր եղանակով, վերոնշյալ երիտասարդներին սպանելու նպատակով ապօրինի պահվող ինքնաձիգից բազմաթիվ անկանոն կրակոցներ է արձակել տղամարդկանց ուղղությամբ, որոնք գտնվել են «Հունդայի Էլանտրա» մակնիշի ավտոմեքենայի մեջ և դիմել փախուստի:
Դեպքի առթիվ ՀՀ քննչական կոմիտեի Արմավիրի մարզային քննչական վարչության Վաղարշապատի քննչական բաժնում հարուցվել է քրեական գործ: Նշանակվել է դիակի դատաբժշկական փորձաքննություն:
Նախաքննությունը շարունակվում է:
Ավելի վաղ հայտնել էինք, որ քննիչները սպանության վայրում հայտնաբերել են ինքնաձիգից արձակված 30-ից ավելի կրակված պարկուճներ, իսկ կրակոցի վայրից մոտ 200 մետր հեռավորության վրա հայտնաբերվել է վթարված Hyundai Elantra ավտոմեքենա, որի վրա հայտնաբերվել են կրակոցների հետքեր: Կրակոցների հետևանքով էլ վնասվել է քաղաքացուն պատկանող իր տան առջև կայանված Ford Transit մակնիշի ավտոմեքենա:
