Վեդի քաղաքում այսօր լարված իրավիճակ է եղել: Քաղաքի փողոցներից մեկում Արցախի հերոս, փոխգնդապետ Դավիթ Ղազարյանի լուսանկարով վահանակը հանվել էր և նույն տեղում փակցվել Ռոբերտ Քոչարյանի գիրքը գովազդող պաստառը, ինչը բուռն արձագանք էր ստացել քաղաքացիների շրջանում: Այս մասին հայտնում է Armtimes.com-ը:
Արցախի հերոսի ընկերը՝ Արթուր Մարտիրոսյանը, ՀԺ-ի հետ զրույցում նշեց, որ Դավիթի նկարը հեռացնելուց հետո Վեդիի բնակիչները հավաքվել են ու ցանկացել պատռել Քոչարյանի պաստառը՝ պահանջելով որպեսզի հետ տեղադրել Արցախի հերոսի նկարը:
«Բայց Դավիթի հայրիկը չի թողել, ասել է՝ թող մնա, կգան քաղաքապետարանի աշխատակիցները կփոխեն: Բնակիչների բողոքից հետո նկարը փոխել են: Դավիթը մեր հերոսն է, բոլորիս հերոսն է, մեզ համար է իր արյունը թափել ու այսօր էլ իր ծննդյան օրն է: Եկեք քաղաքականությունը չխառնենք այս ամենի հետ»,-հավելեց զոհված փոխգնդապետի ընկերը:
Հարցին՝ քաղաքապետարանը տեղյա՞կ է եղել նկարների փոփոխման մասին, Արթուր Մարտիրոսյանը նշեց, որ քաղաքապետն ասել է, թե տեղյակ չեն եղել: Ճշտող հարցին՝ ինքը տեղյա՞կ է ովքեր են հանել լուսանկարը, Դավիթ Ղազարյանի ընկերը բացասական պատասխան տվեց:
Նշենք, որ Դավիթ Ղազարյանը զոհվել է 44 օրյա պատերազմի ժամանակ։ Փոխգնդապետն իրականացրել է կրակի վարում, հակառակորդին պատճառել կենդանի ուժի զգալի կորուստներ, աչքի ընկել տրված ստորաբաժանումների ղեկավարման և վիրավոր զինծառայողների տարհանման գործում:
Մանրամասները՝ սկզբնաղբյուր կայքում:
