Հանրապետության նախագահ Արմեն Սարգսյանն ուղերձ է հղել Հաղթանակի եւ խաղաղության տոնի առթիվ:
Ուղերձում ասվում է.
«Սիրելի հայրենակիցներ,
Այսօր Հաղթանակի եւ խաղաղության օրն է:
Հիշենք բոլորին, ովքեր պայքարել են հաղթելու վստահությամբ եւ չպարտվելու հաստատակամությամբ:
Հիշենք բոլորին, ովքեր ընկել են հաղթանակի ու խաղաղության համար:
Խոնարհվենք նրանց հիշատակի ու սխրանքի առաջ:
Նրանք հաղթեցին շուրջ 30 տարի առաջ Շուշին ազատագրելով:
Նրանք հաղթեցին ավելի քան 75 տարի առաջ Բեռլինը գրավելով:
Նրանք բոլորը համոզված էին, որ ազատությունն ու հաղթանակը երբեք չեն մատուցվում որպես նվեր, որ դրանք ձեռք են բերվում կամքի ու ջանքի շնորհիվ, շատ հաճախ՝ կյանքի ու առողջության գնով:
Երկրորդ համաշխարհային եւ Հայրենական պատերազմներում հայ ժողովուրդը, Խորհրդային Միության եւ Եվրոպայի այլ ժողովուրդների կողքին հերոսաբար մասնակցեց ֆաշիզմի դեմ պայքարին:
Արդեն 20-րդ դարավերջին մեր ժողովուրդը վերստին բախվեց ծրագրված հայատյացության փաստին եւ այս անգամ ստիպված էր պայքարել ադրբեջանական ագրեսիայի դեմ:
21-րդ դարում մենք կրկին դեմ հանդիման էինք ատելությանը եւ էթնիկ զտումների սպառնալիքին՝ ի դեմս Արցախի դեմ ուղղված ադրբեջանաթուրքական միացյալ պատերազմի:
Այս օրերին, երբ ֆաշիզմի դեմ համաշխարհային հաղթանակի հերթական տարեդարձն է, աշխարհը նոր մարտահրավերների առաջ է: Մենք կարիք ունենք վերաիմաստավորել հաղթանակի եւ խաղաղության գաղափարները՝ գիտակցելով դրանց բարձր արժեքն ու կարեւորությունը:
Այդ գաղափարների համար զոհվեցին մեր պապերը Երկրորդ համաշխարհային եւ Հայրենական պատերազմներում: Խոնարհվում եմ նրանց հիշատակի առաջ եւ բարեմաղթանքներս հղում մեր այն վետերաններին, ովքեր կյանքի ու գործի կենդանի դասագիրք են:
Այդ գաղափարների համար իրենց զոհաբերեցին նրանց նորօրյա սերունդներն արցախյան առաջին պատերազմում: Թող լույս իջնի նրանց շիրիմներին:
Այդ գաղափարների համար իրենց կյանքը նվիրաբերեցին մեր այսօրվա հերոսներն Արցախում: Աղոթում եմ նրանց հոգիների հանգստության համար, խոնարհումս բերում նրանց հիշատակներին եւ շնորհակալության ու մխիթարանքի խոսքերս հղում նրանց ընտանիքներին ու հարազատներին:
Աղոթում եմ մեր վիրավոր զինվորների ապաքինման, գերիների շուտափույթ վերադարձի, անհայտ կորածների արագ հայտնաբերման համար՝ ի սպաս դնելով իմ ջանքերն ու հնարավորությունները:
Մեր սահմանները հսկող, մեր խաղաղությունը պաշտպանող եւ անվտանգությունն ապահովող զինծառայողներին ու կամավորներին մաղթում եմ առողջություն եւ անփորձանք ծառայություն:
Սիրելի հայրենակիցներ,
Այս տարի լրանում է Հայաստանի անկախության հռչակման 30-ամյակը: Անկախության ձեռքբերումը նույնպես ազատության ու կամքի հաղթանակն էր: Այսօր, տարիների հեռվից, այն հիշեցնում է, որ որեւէ ձեռքբերում, առավել եւս՝ հաղթանակ պետք է զարգացնել եւ վերածել ուժեղ պետության ու կազմակերպված հասարակության, արժանապատիվ խաղաղության եւ կայուն առաջընթացի:
Մենք պարտավոր ենք հաղթել: Դրա երաշխիքը մեր միասնությունն է ու կամքը, մեր վճռականությունը եւ կազմակերպվածությունը, մեր նպատակասլացությունը եւ կարգապահությունը:
Ապրենք եւ աշխատենք այնպես, որ արժանի լինենք հաղթանակի:
Փա՛ռք Հաղթանակի հերոսներին:
Կեցցե՛ն Հայաստանը եւ Արցախը:
Կեցցե՛ մեր ժողովուրդը»:
