Սիսական ջոկատի հրամանատար, ազատամարտիկ Աշոտ Մինասյանը Սյունիքի Սեւ լճի տարածքում թշնամու առաջխաղացումը պայմանավորում է ռազմաքաղաքական հանգամանքներով։
«Եթե այսպես կոչված պետությունը չունի պետականություն, իշխանություն, բանակ, հրամանատարություն, դրա հետեւանքը լինելու էր սա։ Եթե պետությունը չունի գերագույն գլխավոր հրամանատար, զինվորը չգիտի իր անելիքը, զորքը գտնվում է անօգնական, անտեր վիճակում, նա տարակուսած է։ Ավելի փոքր հրամանատարները նման խնդիր չեն կարող լուծել, մինչեւ չխորհրդակցեն վերին հրամանատարության հետ, որը մենք չունենք։ Կարող է լինել նաեւ երկրորդ տարբերակը. չի բացառվում, որ պետության ղեկավարը միտումնավոր հանցավոր համաձայնության գալով թշնամու ուժերի հետ՝ սարքել է այս ամենը, որպեսզի չեղարկի ընտրությունները»,– NEWS.am-ի հետ զրույցում նշել է ազատամարտիկը։
Նրա խոսքով՝ թշնամուն անցած տարածքում մեր սահմանային կարեւորագույն դիրքերն էին։
«Այդ տարածքը մեզ համար շատ կարեւոր է. ամբողջ Գորիսի, Սիսիանի գլխին կախված է վտանգ։ Այսինքն՝ Գորիսն ու Սիսիանն իրենց գյուղերով թշնամու թիրախի տակ են հայտնվում»,– նշեց Աշոտ Մինասյանը։
Նախօրեին հրավիրված Անվտանգության խորհրդի նիստում, վարչապետի պաշտոնակատար Նիկոլ Փաշինյանը հայտարարեց ՀԱՊԿ դիմելու մասին եւ համապատասխան հանձնարարականներ տվեց այդ առնչությամբ աշխատանքներ սկսելու համար։ Մինասյանը տարակուսում է. ՀԱՊԿ–ին մերժող իշխանությունները, հիմա դիմել են այդ կառույցի՞ն։
«Այդ նույն ՀԱՊԿ–ին իրենք չէին ընդունում, մերժում էին, հիմա դիմել են որպես ո՞վ եւ ի՞նչ։ ՀԱՊԿ–ից շատ բան կարելի էր սպասել, սակայն, չէ՞ որ մենք երեք տարվա ընթացքում տեսել ենք մեր իշխանությունների վերաբերմունքը ՀԱՊԿ–ի նկատմամբ»,– ասաց Մինասյանը։
