Կոտայքի մարզպետ Ահարոն Սահակյանը նախօրեին ընդունել է Ներառական իրավական բարեփոխումների կոալիցիայի ներկայացուցիչներին՝ կոալիցիայի շահերի պաշտպանության համակարգող Անուշ Ասլանյանին, համայնքների հզորացման կոալիցիայի հանձնաժողովի համակարգող Հայկ Մկրտչյանին, «Լռության ձայն» ՀԿ նախագահ, կոալիցիայի անդամ Արտաշես Հովհաննիսյանին:
Հանդիպումը ճանաչողական էր, որի ընթացքում հյուրերը ներկայացրել են կոալիցիայի գործունեությունը, ուղղությունները, առաջնահերթությունները և այս համատեքստում հաշմանդամություն ունեցող անձանց համակողմանի աջակցությանն ուղղված քաղաքականությունը, մարզպետի հետ քննարկել նաև մարզում հաշմանդամություն ունեցող անձանց համար մատչելիության ապահովման, իրավունքների պաշտպանության, ինչպես նաև մեր երկրում բոլորի համար հավասար պայմաններ և մատչելի միջավայր ունենալու հարցերը:
Մարզպետը իր և մարզպետարանի անունից պատրաստակամություն է հայտնել աջակցելու ոչ միայն կոալիցիայի կողմից իրակակացվող միջոցառումների, նախաձեռնությունների իրականացմանը, այլ նաև մարզպետարանի համապատասխան ստորաբաժանումների մասնագետների ներգրավմամբ նպաստել հաշմանդամություն ունեցող անձանց խնդիրների վերհանմանը, լուծմանը, ինչպես նաև աջակցել վերջիններիս իրավական և այլ խորհրդատվությունների տրամադրման հարցում:
Նշենք, որ Ներառական իրավական բարեփոխումների կոալիցիան հաշմանդամություն ունեցող անձանց հարցերով զբաղվող 14 կազմակերպություների միություն է:
