Կոտայքի մարզպետ Ահարոն Սահակյանը Տարածքային կառավարման և ենթակառուցվածքների նախարար Սուրեն Պապիկյանի հետ շրջել է Հայաստանում կառուցվող առաջին սանիտարական աղբավայրի շինհրապարակում, ծանոթացել շինարարության աշխատանքների ընթացքին, շինարարների հետ քննարկել աշխատանքների իրականացման ընթացքը։
Աղբավայրը կառուցվում է Կոտայքի մարզում՝ Հրազդանի վարչական տարածում, Հայաստանի Հանրապետության ու Վերակառուցման և զարգացման եվրոպական բանկի միջև ստորագրված «Կոտայքի և Գեղարքունիքի մարզերի կոշտ կենցաղային թափոնների կառավարման ծրագրի» իրականացման համաձայնագրի շրջանակում:
Նոր աղբավայրի տարածքում ներկայում ընթանում են թափոնների հեռացման համար անհրաժեշտ շինարարական աշխատանքներ, տեղադրվում են կեղտաջրերի հեռացման և գազի հավաքման խողովակներ, ընթացքի մեջ են վտանգավոր թափոնների պահեստի, աղբատար մեքենաների կշռման համար համապատասխան ենթակառուցվածքների և երթուղու համար նոր ճանապարհահատվածի կառուցման աշխատանքները։
Հիշեցնենք, որ «Կոտայքի և Գեղարքունիքի մարզերի կոշտ կենցաղային թափոնների կառավարման ծրագրի» շրջանակում նախատեսվում է կառուցել ԵՄ չափանիշներին ու ստանդարտներին համապատասխան սանիտարական աղբավայր՝ իր բոլոր ենթակառուցվածքներով՝ այդ թվում հողի, ստորգետնյա ջրերի և օդի աղտոտվածության բացառման համար նախատեսված ենթակառուցվածքներով, ինչպես նաև ադմինիստրատիվ շենքերով ու ճանապարհային ուղիներով։ Երկու մարզի բնակավայրերում կներդրվի աղբահանության արդյունավետ համակարգ, Կոտայքի մարզի Ակունք և Գեղարքունիքի մարզի Մարտունի համայնքներում կկառուցվեն աղբի փոխաբեռնման կայաններ։
Ծրագրի ընդհանուր բյուջեն 11,0 մլն եվրո է, որից 5,5 մլն եվրոն հանդիսանում է վարկային միջոց, 5,5 մլն եվրոն` դրամաշնորհ: Շինարարությունը համաֆինանսավորվում է Եվրոպական միության, Վերակառուցման և զարգացման եվրոպական բանկի, Արևելյան Եվրոպայի էներգախնայողություն և շրջակա միջավայրի գործընկերություն հիմնադրամի (E5P) , Եվրոպական հարևանության ներդրումային հիմնադրամի (NIF) կողմից:
Շինարարությունը նախատեսվում է ավարտել 2022 թվականին։
Կոտայքի մարզպետարան
