Երեկ ողջ օրն ու անցնող գիշերն Ադրբեջանի զինված ուժերը ականանետային հարվածներ են հասցրել Արցախի բնակավայրերին. ԱՀ ՊԲ

Մարտի 9-ին օրվա ընթացքում, այնուհետեւ ողջ գիշեր Ադրբեջանի զինված ուժերը, տարբեր տրամաչափի հրաձգային զինատեսակների, ինչպես նաեւ ականանետերի կիրառմամբ, պարբերաբար խախտել է հրադադարը։

Այս մասին հայտնում են Արցախի Հանրապետության պաշտպանության նախարարության մամուլի ծառայությունից՝ նշելով, որ մարտի 9-ին, ժամը 14։00-14։30 ի սահմաններում ԱՀ Մարտունու շրջանի Խնուշինակ գյուղի հարակից տարածքի ուղղությամբ արձակվել է 60 մմ տրամաչափի ականանետի 2 հատ ական, իսկ ժամը 15։50֊ից մինչեւ մարտի 10-ի ժամը 05։40-ն ընկած ժամանակահատվածում հակառակորդը 15 անգամ՝ 60 մմ. տրամաչափի ականանետ է կիրառել արեւելյան ուղղությամբ՝ Խրամորթ գյուղի հարակից տարածքի վրա արձակելով ընդհանուր առմամբ 23 հատ ական։

Հայկական կողմից տուժածներ չկան։

Հրադադարի կոպիտ խախտումների վերաբերյալ տեղեկացվել է Արցախում խաղաղապահ առաքելություն իրականացնող ՌԴ զորակազմը։